كشفت الممثلة المصرية إنتصار لأول مرة عن الخلافات التي حدثت بينها وبين زميلتها الممثلة شيماء سيف في كواليس برنامج "نفسنة"، وحقيقة تآمر إنتصار لاستبعاد شيماء من البرنامج بمؤامرة مع زميلتها هيدي كرم، واعترفت بأنها وصفت نفسها بالنجمة الأهم داخل البرنامج.
وأضافت إنتصار خلال لقائها في برنامج "العرافة" الذي تُقدمه الإعلامية بسمة وهبة، عبر شاشة "المحور": هو أنا مرات أبوها، هي عملت مسلسل وقالت كنت ماشية وعديت من أمام الغرفة وسمعتهم بيرتبوا لقصة علشان أمشي من البرنامج وفتحت الباب وواجهتنا.. هي مفيش حاجة عندها في البرامج وبتدور على أي حاجة تتكلم فيها.
وتابعت: نفسنة كان أول حاجة تعملها (شيماء سيف) وأنا اللي مشهورة في حياتها علشان كده باسمع سيرتي في البرامج على طول ولا أعلق.
وواصلت قائلة: كنا فعلا بنتكلم عنها في الأوضة بس مكناش بنجيب سيرة والدها أو والدتها.. كنا بنتكلم عن الشغل وعملت مشاكل كتير علشان كده كنا بنتكلم.
وأكدت إنتصار نافيةً، أن يكون إستبعادها من برنامج "نفسنة" الذي كانت تقدمه مع الممثلتين هيدي كرم وشيماء سيف، بسبب زلة لسان، وتحديداً قولها "أنا النجمة هنا"، وقالت: التعالي مش من صفاتي، أنا بقالي كتير بشتغل، أنا طيبة جدا.
واستكملت: ولما أقول أنا النجمة هنا ده حقي، أنا قلت أنا النجمة، الناس بتستغرب ليه لما أقول أصل أنا الجامدة أوي، أصل أنا الحلوة أوي وأهم كوميديانة في مصر، الناس مستكترة عليّ ليه اللي أنا فيه.
وتابعت: هو أنا أفضل أشتغل 20 سنة ولما آجي أقول أنا مشهورة يتقال إني متعالية؟! أنا مشهورة، اللي مش عاجبه إني مشهورة يضرب راسه في الحائط.
وواصلت قائلة: ممشتش من البرنامج بدليل إني كملت بعد كده، لكن أنا مشيت لأن عندي مسلسلات كتير وبما إني أنا النجمة فأنا أكتر واحدة بشتغل في السوق، مسلسلات وأفلام ومسرحيات، الضغط عالي جدا، ومفيش تعاون من القناة في تنظيم أيام التسجيل.
وأوضحت انتصار: بسجل 3 أيام كل 15 يوم، ولما يكون عندي مسرحية في إسكندرية ومسلسل، يبقى نتعاون مع بعض شوية، سجلوا مع حد غيري أنا قابلة تجيبوا حد تاني لحد ما أشوف شغلي في الإسكندرية، رفضوا كل حلولي، وشعرت بالتعنت، ومع شوية هيصة، وعند أول تلكيكة خلعت.
